26 Maw 2025

Mae Trafnidiaeth Cymru (TrC) wedi cydweithio â'r cogydd Michelin enwog, James Sommerin, i ddod â lefel newydd o foethusrwydd i'w wasanaeth Dosbarth Cyntaf.

Bydd y fwydlen unigryw, gyfyngedig ar gael am wyth wythnos o 7 Ebrill ymlaen, ar wasanaethau Dosbarth Cyntaf dethol rhwng Caerdydd a Chaergybi, a Chaerdydd a Manceinion.

Wedi'i chynllunio gan James Sommerin a'i gweini’n arbenigol gan gogyddion TrC, mae'r fwydlen newydd yn dangos angerdd Trafnidiaeth Cymru a James am gynhwysion lleol o'r radd flaenaf a'i ddull arloesol o greu prydau Cymreig modern.

Enillodd James Sommerin, un o gogyddion enwocaf Cymru, ei seren Michelin gyntaf yn nhafarn The Crown Abergwenffrwd yn 2007. Ers hynny, mae ei fwyty 'Home', ym Mhenarth wedi ennill ei blwyf fel cyrchfan anhepgor i bawb sy'n dwlu ar fwyd amheuthun.

Mae ei goginio crefftus, sydd wedi ennill clod a bri gan feirniaid bwyd a phersonoliaethau teledu fel ei gilydd, bellach yn mynd ar y cledrau, gan gynnig profiad bwyta penigamp i deithwyr.

Dywedodd James Sommerin:

"Dwi'n angerddol am gyflwyno bwyd gwych i leoedd annisgwyl, ac yn falch iawn o gydweithio â Trafnidiaeth Cymru ar y fwydlen Dosbarth Cyntaf hon. Rydyn ni wedi gweithio'n galed i greu prydau sy'n tynnu sylw at gynhwysion gorau'r genedl, gan sicrhau eu bod nhw’n ffres, yn flasus, ac yn berffaith addas i fwyta ar drên.

"Blas yw pob dim – creu danteithion mae pobl wir yn eu mwynhau gan ddathlu Cymru a phopeth sydd ganddi i'w gynnig. Mae’n gyfle gwych i godi'r gwasanaeth i lefel arall, a dwi'n edrych ymlaen at dynnu dŵr o ddannedd y teithwyr."

Gall teithwyr edrych ymlaen at uchafbwyntiau fel: cig eidion Cymru wedi'i frwysio'n araf gyda shibwns wedi'u carameleiddio a briwsion caws cheddar Blaenafon, cwstard wy gwymon gyda salad cranc ffres ac afal, a phwdin siocled tywyll cynnes gyda hufen Merlyn ac oren.

Mae Trafnidiaeth Cymru wedi lansio cegin o'r radd flaenaf yng Nghasnewydd yn ddiweddar hefyd, fel rhan o ymrwymiad y cwmni i gynhyrchu prydau cynaliadwy o'r radd flaenaf i deithwyr. Mae'r

cydweithio hwn hefyd yn cynnwys pwyslais ar ganfod cynhwysion gan gyflenwyr Cymreig fel Castell Howell i leihau ôl-troed carbon.

Bydd Mark Roberts, Prif Gogydd TrC, a gydweithiodd yn agos â James ar y fwydlen, yn goruchwylio'r broses o baratoi’r prydau, gan sicrhau bod tîm y trên yn cynnal y safonau uchaf o ran ansawdd a gwasanaeth pob cam o'r daith.

Ychwanegodd Prif Gogydd Trafnidiaeth Cymru, Mark Roberts:

"Rydyn ni'n edrych ymlaen at gyflwyno seigiau seren Michelin i'n teithwyr Dosbarth Cyntaf. Mae'r fwydlen hon yn nodi'r bennod nesaf yn ein hymrwymiad i gyflwyno profiadau teithio hygyrch, o ansawdd uchel. A thrwy lansio ein cegin newydd yng Nghasnewydd, rydyn ni mewn sefyllfa well nag erioed i weini prydau premiwm, o ffynonellau lleol. Mae prydau premiwm ar TrC wedi bod yn drysor cudd am yn rhy hir o lawer, felly rydyn ni'n edrych ymlaen at weld mwy o deithwyr yn mwynhau’r wledd.”

Er mwyn sicrhau bod ciniawa Dosbarth Cyntaf yn fwy hygyrch, mae TrC hefyd wedi meithrin partneriaeth â Seatfrog, sy'n caniatáu i deithwyr wneud cais i uwchraddio i gerbyd Dosbarth Cyntaf neu brynu tocyn Dosbarth Cyntaf yn hawdd ar wasanaethau penodol, am ffracsiwn o'r pris gwreiddiol.

Dim ond am wyth wythnos y bydd y fwydlen gyfyngedig hon ar gael, gan gynnig blas ar fwyd seren Michelin i deithwyr Dosbarth Cyntaf ledled Cymru a thu hwnt.

Gellir mwynhau dau gwrs am £24.95 neu dri chwrs am £27.95. Gallwch ychwanegu potel 75cl o win y tŷ, gan ddod â'r cyfanswm i £37 am ddau gwrs neu £40 am dri chwrs.

Gallwch ddysgu mwy yma am wasanaeth Dosbarth Cyntaf Trafnidiaeth Cymru.