14 Tach 2025

Heddiw, mae Ei Fawrhydi, y Brenin Charles, wedi agor Depo Metro De Cymru yn Ffynnon Taf yn swyddogol.

Yn gartref i Metro De Cymru, mae'r depo gwerth £100 miliwn yn darparu dros 400 o swyddi a dyma lle bydd fflyd o 36 o drenau tram newydd sbon yn cael eu cynnal a’u cadw.

Bydd agor y depo a chyflwyno'r trenau tram cyntaf y flwyddyn nesaf yn barhad o’r gwaith o drawsnewid trafnidiaeth ledled De Cymru.

Mae Trafnidiaeth Cymru yn cyflawni Metro De Cymru, un o brosiectau seilwaith mwyaf Cymru. Mae hyn yn cynnwys trydaneiddio dros 170km o gledrau rheilffordd, gan ganiatáu cyflwyno trenau trydan ar reilffyrdd Cymoedd De Cymru am y tro cyntaf erioed y llynedd.

Mae'r safle 5 hectar, sy'n cynnwys depo trenau newydd sbon, safle cadw ar gyfer y 36 trên tram a'r Ganolfan Reoli Integredig bellach wedi'i gwblhau'n llawn ac ar agor.

Mae’r prosiect, a alwyd yn ddiweddar yn 'Tiwb Cymru', yn cysylltu rhai o gymunedau mwyaf difreintiedig Ewrop â'i gilydd, â Chaerdydd a thu hwnt, a'i nod yw gwella mynediad at ganolfannau cyflogaeth, hamdden ac iechyd, gan hybu potensial economaidd Cymoedd De Cymru.

Cyfarfu’r Brenin Charles â staff yn y depo ac aeth ar daith yng ngherbyd y gyrrwr ar un o’r trenau tram newydd, gyda phlant o dair ysgol leol a chynrychiolwyr o'r gymuned wedi’u gwahodd i ymuno â’r dathliadau.

Dywedodd y Prif Weinidog Eluned Morgan: “Mae gwella trafnidiaeth ledled Cymru yn un o fy mhrif flaenoriaethau – buddsoddi mewn trafnidiaeth o ansawdd uchel sy’n fwy dibynadwy, yn fwy cyfleus ac yn fwy pleserus i’w defnyddio.

“Rydym eisoes yn gweld manteision sylweddol ein buddsoddiad ym Metro De Cymru.

“Mae gwasanaethau gwell, trenau newydd sbon a thocynnau Talu Wrth Fynd wedi trawsnewid teithio i deithwyr.

“Mae agor Depo Ffynnon Taf yn nodi carreg filltir bwysig yn ein buddsoddiad o £1bn i uwchraddio Llinellau Craidd y Cymoedd.

“Mae’n rhan o’r seilwaith hanfodol y tu ôl i’r llenni, a fydd yn gwneud gwahaniaeth mawr i bobl yn eu bywydau bob dydd, boed hynny wrth ei gwneud hi’n haws mynd i’r gwaith neu hyfforddiant, neu archwilio’r wlad ar ein rhwydwaith rheilffyrdd gwych.”

Dywedodd James Price, Prif Swyddog Gweithredol Trafnidiaeth Cymru: “Pleser o’r mwyaf fu croesawu Ei Fawrhydi, y Brenin Charles i Ffynnon Taf heddiw er mwyn iddo gael ymweld â’n Depo Metro yn Ne Cymru.

“Gyda rheilffyrdd wedi’u trydaneiddio, trenau newydd sbon a depo o’r radd flaenaf, mae Metro De Cymru yn trawsnewid y ffordd y mae pobl yn teithio yn y rhanbarth ac, yn bwysicaf oll, yn cysylltu pobl a chymunedau â chyfleoedd.

“Rydym wrthi'n cwblhau'r camau olaf o drydaneiddio 170 km o gledrau ac eisoes wedi cyflwyno ein trenau trydan cyntaf ar y rhwydwaith, ynghyd â thocynnau talu wrth fynd i’n cwsmeriaid.

“Rydym yn gyffrous i ddechrau cyflwyno’r trenau tram newydd sbon y flwyddyn nesaf, wrth i ni barhau i drawsnewid teithio a denu pobl i ddefnyddio trafnidiaeth gyhoeddus.

“Hoffwn fanteisio ar y cyfle hwn i ddiolch i’n holl tîm a’n partneriaid adeiladu am eu gwaith caled i ddarparu’r depo newydd.

“Hoffwn ddiolch yn arbennig i’r gymuned leol yn Ffynnon Taf am eu cefnogaeth a’u hamynedd drwy gydol y prosiect adeiladu mawr ac am ein helpu i’w enwi’n lleol yn ‘Depo’r Goeden Cnau Ffrengig’.

Ychwanegodd Vernon Everitt, Cadeirydd Trafnidiaeth Cymru: "Mae Metro De Cymru yn trawsnewid trafnidiaeth yn y rhanbarth ac mae agor y depo hwn yn dynodi dechrau pennod newydd i drafnidiaeth gyhoeddus yng Nghymru.

"Mae trafnidiaeth yn hanfodol i alluogi twf economaidd cynaliadwy, cynhyrchiant uwch a mynediad at gartrefi, swyddi, addysg, gwell iechyd a chyfleoedd i bawb.

"Wrth ei wraidd, mae trafnidiaeth yn ymwneud â mynd i'r afael ag anghydraddoldeb o bob math a bydd Metro De Cymru yn gwella bywydau'r rhai sy'n byw yn y cymoedd ac yn helpu i ddarparu dyfodol gwell i genedlaethau i ddod.

"Felly, mae'r cyfleuster hwn gwerth can miliwn o bunnoedd yr ydym yn ei agor heddiw yn llawer mwy na brics, morter a thraciau dur. Mae'n gonglfaen ar gyfer bywydau gwell yn Ne Cymru ac yn gatalydd ar gyfer adfywio.

"Mae Trafnidiaeth Cymru yn cyflawni newid a gwelliannau mewn trafnidiaeth gyhoeddus ar draws Cymru gyfan ac yn y gororau a'n gweledigaeth yw creu un rhwydwaith integredig, gan ddod â llwybrau rheilffordd, bysiau a theithio llesol ynghyd."