12 Tach 2026

Mae gweithredwyr trafnidiaeth yn atgoffa cefnogwyr rygbi sy’n teithio i Gaerdydd ar gyfer gemau rhyngwladol yr Hydref Cymru yn erbyn Seland Newydd ac Awstralia i gynllunio ymlaen llaw.

Yn dilyn llwyddiant ein gweithredwyr trafnidiaeth ar ddiwrnod gêm Cymru yn erbyn Japan a welodd dros 50,000 o bobl yn teithio i mewn ac allan o’r ddinas, mae Trafnidiaeth Cymru (TrC) a Great Western Railway (GWR) yn disgwyl gofyn uchel parhaus ar draws y rhwydwaith trenau ar gyfer gweddill y gemau.

Mae cynlluniau ar gyfer trenau ychwanegol ac ar gyfer rheoli torfeydd o hyd yn eu lle er mwyn cadw cefnogwyr i symud mewn ffordd ddiogel ac effeithlon wedi i’r gêm orffen.

Bydd system giwio wedi’r gêm yn ei lle yng ngorsafoedd trenau Caerdydd Canolog a Heol y Frenhines ar ôl pob gêm, yn dechrau o:

• 1530 ar gyfer Cymru yn erbyn Seland Newydd | 14 Tachwedd
• 2130 ar gyfer Cymru yn erbyn Awstralia | 21 Tachwedd

Gall cwsmeriaid ddefnyddio naill orsaf neu’r llall hyd nes i’r system reoli torfeydd ddechrau.

Ar ôl yr amserau hyn, caiff cwsmeriaid sy’n teithio i orsafoedd Treherbert, Aberdâr, Merthyr, Rhymni, Coryton, Bae Caerdydd, Penarth, Bro Morgannwg eu cyfeirio at orsaf drenau Caerdydd Heol y Frenhines.

Bydd yr holl giwiau eraill, gan gynnwys Glyn Ebwy, Maesteg, Cheltenham Spa a gwasanaethau tuag at Fryste, Llundain, Manceinion, Gorllewin Cymru a Gogledd Cymru, ar sgwâr Caerdydd Canolog.

Bydd ciw hygyrchedd ar gael yn y ddwy orsaf.

Dywedodd Georgie Porter, Pennaeth Cynllunio a Chyflenwi Digwyddiadau Trafnidiaeth Cymru: “Yn dilyn gweithrediad hynod o lwyddiannus ar gyfer gêm Japan, rydym yn barod i groesawu cefnogwyr yn ôl i Gaerdydd am ddau benwythnos arall o rygbi.

“Ein prif flaenoriaeth yw cludo pawb i Gaerdydd a’u cael nhw oddi yno mewn ffordd ddiogel a didrafferth. Mae’r systemau ciwio wedi’r gêm wedi’u dylunio i gadw cefnogwyr i symud mor gyflym ag sy’n bosib, ac rydym yn annog i bawb wirio pa giw sydd angen iddynt ymuno â nhw ar ôl y gêm ac i adael digon o amser ar gyfer eu teithiau.”

Ychwanegodd Cyfarwyddwr Gwasanaethau Cwsmeriaid GWR, Rachel Geliamassi: “Rydym yn argymell yn gryf bod cefnogwyr sy’n teithio ar wasanaethau GWR i Gaerdydd Canolog yn archebu seddi ymlaen llaw er mwyn osgoi unrhyw siom. Gall cynllunio ymlaen llaw ac archebu tocynnau’n gynnar eich helpu chi i ymlacio a ffocysu ar fwynhau’r rygbi.

“Byddem yn annog i gwsmeriaid wirio amserau’r teithiau a gadael digon o amser i fynd ar y trenau’n ddiogel. Cofiwch y bydd trenau’n hynod o brysur cyn i’r gêm ddechrau ac yn syth ar ôl y gêm hefyd.”

https://trc.cymru/lleoedd/digwyddiadau/gemau-rhyngwladol-yr-hydref