23 Medi 2025

Mae Trafnidiaeth Cymru yn parhau i ddangos gwelliant ym mhrydlondeb gwasanaethau trên ar draws rhwydwaith Cymru a'r Gororau. 

Mae’r ffigurau diweddaraf a gyhoeddwyd gan yr ORR yn datgelu bod Trafnidiaeth Cymru wedi cyflawni’r gwelliant mwyaf o ran prydlondeb ymhlith cwmnïau trenau rhwng mis Ebrill a mis Mehefin 2025. 

Yn ystod y cyfnod hwn, mae data'n dangos bod 83.7% o'i wasanaethau wedi rhedeg ar amser - cynnydd o 1.5 pwynt canran o'i gymharu â'r un cyfnod yn y flwyddyn flaenorol. 

Cesglir y data hwn gan ddefnyddio'r dull Amser i 3, sy'n mesur canran yr arosfannau gorsaf lle cyrhaeddodd trenau naill ai'n gynnar neu o fewn tri munud i'w hamser amserlen. 

Mae hyn yn bennaf oherwydd y gyflwyniad o'r trenau dosbarth 756 newydd sbon ar Linellau Craidd y Cymoedd (CVL) yn gynharach eleni, sydd yn rhan o fuddsoddiad £800 miliwn Llywodraeth Cymru mewn trenau newydd. 

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates: “Rwy’n falch iawn o weld mwy o dystiolaeth yn dangos y budd y mae ein buddsoddiad o £800m mewn trenau newydd yn ei gael. Mae’n garreg filltir arall ar ein cenhadaeth i drawsnewid ein rheilffyrdd.

“Rwy’n edrych ymlaen at weld mwy o deithwyr yng Ngogledd Cymru yn defnyddio gwasanaethau TrC dibynadwy ac ar amser ar Brif Linell Gogledd Cymru, gyda’r cynnydd o 50% mewn gwasanaethau o fis Mai 2026 diolch i Rwydwaith Gogledd Cymru.” 

Ychwanegodd Marie Daly, Prif Swyddog Gweithredu yn TrC: "Mae gwella profiad y cwsmer wedi bod wrth wraidd i’r hyn yr ydym yn ceisio'i wneud yn TrC erioed. 

"Dros yr ychydig flynyddoedd diwethaf, rydym wedi bod yn cyflwyno trenau newydd sbon i'n rhwydwaith yn barhaus mewn dull graddol fel rhan o fuddsoddiad o £800 miliwn Llywodraeth Cymru mewn trenau newydd sbon yng Nghymru." 

"Mae'r trenau newydd hyn yn trawsnewid profiad y cwsmer ac rydym bellach mewn cyfnod lle maent yn cael effaith gadarnhaol iawn ar berfformiad ein rheilffyrdd. 

"Mae'r buddsoddiad o £800 miliwn mewn trenau newydd sbon yn darparu gwelliannau pendant i bawb sy'n teithio gyda ni ac rydym yn edrych ymlaen at welliannau pellach pan fyddwn yn croesawu ein trenau tram i'n rhwydwaith y flwyddyn nesaf.”