08 Hyd 2025
Bydd dyfodol trafnidiaeth drydanol yng Nghymru i’w weld yn llawn ym mis Hydref eleni, gyda Trafnidiaeth Cymru wedi’i chyhoeddi fel prif noddwr Rali EV Cymru 2025.
Yn rhedeg ar y 22 a 23 Hydref 2025, bydd y digwyddiad proffil uchel sy’n dathlu arweinyddiaeth Cymru mewn symudedd cynaliadwy yn gweld confoi o gerbydau trydan (EVs) yn teithio o Wrecsam i Gaerdydd, trwy Ynys Môn, Aberystwyth a Sir Benfro.
Bydd y llwybr yn arddangos cryfder cynyddol seilwaith EV Cymru ac yn tynnu sylw at fentrau ynni gwyrdd a thrafnidiaeth allweddol ar hyd y ffordd.
Dywedodd Tony Clayton, Rheolwr Rhaglen Dadgarboneiddio yn Trafnidiaeth Cymru: “Mae pweru Rali EV Cymru yn rhan o’n cenhadaeth i drawsnewid trafnidiaeth. Mae Cymru ar flaen y gad o ran seilwaith EV, ac mae Trafnidiaeth Cymru yn cyflymu’r daith honno.
“Mae digwyddiadau fel Rali EV Cymru yn helpu i chwalu mythau, meithrin hyder, a dangos pa mor bell yr ydym wedi dod. Allwn ni ddim aros i ddechrau arni.”
Mae Trafnidiaeth Cymru yn partneru â TrydaNi, darparwr clwb ceir cymunedol cerbydau trydan dielw, i lunio tîm a fydd yn cynnwys Kevin Booker, Rheolwr TG a Fflyd o Fannau Brycheiniog, sy'n dal nifer o Recordiau Byd Guinness am yrru cerbydau trydan yn effeithlon. Bydd cynrychiolwyr o'r clwb ceir, Trafnidiaeth Cymru a Llywodraeth Cymru hefyd yn y tîm.
Ar hyn o bryd, Cymru sydd â'r bedwaredd nifer uchaf o bwyntiau gwefru cerbydau trydan sydd ar gael yn gyhoeddus fesul pen yn y DU, ac mae Trafnidiaeth Cymru yn chwarae rhan allweddol wrth ehangu mynediad, yn enwedig mewn ardaloedd gwledig ac ardaloedd heb ddigon o wasanaeth. Trwy ei waith gydag awdurdodau lleol a phartneriaid cenedlaethol, mae Trafnidiaeth Cymru yn helpu i ddarparu gwefrwyr cyflym ar draws y rhwydwaith ffyrdd a rheilffyrdd strategol.
Bydd y rali hefyd yn tynnu sylw at arloesedd ynni glân, gyda thimau'n ymweld â phwyntiau gwirio sy'n cynnwys prosiectau sydd ar flaen y gad o ran y trawsnewid ynni glân. Mae'r prosiectau hyn yn adlewyrchu'r cysylltiad cynhenid rhwng trafnidiaeth lân ac ynni glân - cysylltiad y mae Trafnidiaeth Cymru yn falch o'i hyrwyddo.
Mae nawdd Trafnidiaeth Cymru i Rali EV Cymru 2025 yn adlewyrchu ei ymrwymiad i gyflawni nodau datgarboneiddio Cymru ac adeiladu rhwydwaith trafnidiaeth modern, integredig sy'n gweithio i bobl, cymunedau, a'r planed.
