01 Chw 2021

Bydd partneriaeth gyffrous rhwng Trafnidiaeth Cymru ac Alun Griffiths yn ymgysylltu â disgyblion ysgolion Cymru gyda gweithgareddau ym maes Peirianneg, Trafnidiaeth ac Adeiladu. 

Bydd y digwyddiadau ‘Pont i Ysgolion’, a fydd yn cael eu cynnal gan TrC, yn digwydd ar-lein drwy gydol mis Mawrth 2021. Bydd y sesiynau ar gael i ddisgyblion blynyddoedd 6 i 8 ac yn cael eu cynnal yn ardal Metro De Cymru yn gyntaf, a byddant yn cyflwyno pobl ifanc i’r gwahanol sgiliau adeiladu a pheirianneg sydd eu hangen i adeiladu pont.

Mae TrC hefyd yn awyddus i glywed gan ysgolion mewn ardaloedd eraill sydd â diddordeb mewn cymryd rhan mewn digwyddiadau yn y dyfodol.

Yn ystod y digwyddiad, bydd Alun Griffiths yn defnyddio rhaglen ‘Pont i Ysgolion’ Sefydliad y Peirianwyr Sifil i roi cyfle i bobl ifanc adeiladu fersiwn bach o Ail Groesfan Hafren.

Gan ddefnyddio model o bont 12m sy’n cael ei chynnal gan geblau, bydd plant yn cael profiad uniongyrchol o adeiladu pontydd, gan wisgo hetiau caled, festiau llachar, menyg a gogls. Ar ôl i’r bont gael ei hadeiladu, bydd pob plentyn yn cael cyfle i gerdded ar ei thraws i brofi eu sgiliau peirianneg.

Cyflwynir y sesiwn adeiladu pontydd gan un o Beirianwyr Alun Griffiths, gyda chefnogaeth Swyddog Cyswllt Cyhoeddus a thîm Ymgysylltu â’r Gymuned Trafnidiaeth Cymru.

Er na fydd hi’n bosibl ymweld ag ysgolion a chynnal y sesiwn yn ei fformat arferol gyda’r disgyblion yn ystod y pandemig, mae TrC wedi addasu’r ddarpariaeth a fydd yn galluogi disgyblion i gymryd rhan dros y we.

Dywedodd Lois Park, Pennaeth Ymgysylltu â Chymunedau a Rhanddeiliaid, Trafnidiaeth Cymru: “Rydyn ni wrth ein boddau ein bod yn gweithio gyda’n Partneriaid Cyflenwi Seilwaith, Alun Griffiths, i ddarparu opsiwn gwahanol i'w rhaglen ‘Pont i Ysgolion Sefydliad y Peirianwyr Sifil’ sydd eisoes yn llwyddiannus. Bydd y digwyddiadau ar-lein cyfranogol hyn ar gael i ddisgyblion ledled De Cymru a gobeithio y bydd niferoedd mawr yn gallu ymuno â ni.

“Mae Trafnidiaeth Cymru yn tyfu’n gyflym wrth i ni baratoi i gyflawni nifer o brosiectau trafnidiaeth trawsnewidiol ledled Cymru.

“Mae gennym ni lawer o waith i’w wneud er mwyn darparu rhwydwaith trafnidiaeth diogel, integredig, fforddiadwy a hygyrch o ansawdd uchel y mae pobl Cymru yn falch ohono, felly, tra ydyn ni’n adeiladu’r tîm a fydd yn rhan o hyn nawr, rydyn ni hefyd eisiau tanio’r genhedlaeth nesaf i fod yn gyffrous am y cyfleoedd sydd ar gael ym maes peirianneg trafnidiaeth.

“Rydyn ni hefyd eisiau manteisio ar y cyfle i gael mewnbwn gan bobl ifanc ar yr hyn maen nhw eisiau clywed amdano nesaf. Mae ein rhaglen allgymorth addysg wrthi’n cael ei datblygu ar hyn o bryd ac mae’r bartneriaeth newydd hon yn rhoi cyfle i ni ofyn sut y dylai Trafnidiaeth Cymru ymgysylltu, ysbrydoli a gwella ar gyfer cenedlaethau’r dyfodol.”

Dywedodd Terry Davies, Swyddog Cyswllt Cyhoeddus cwmni Alun Griffiths: “Mae Alun Griffiths Construction yn falch o weithio gyda Trafnidiaeth Cymru ac mae’r cyfle i siarad â pheirianwyr ifanc a gweithwyr adeiladu’r dyfodol mor bwysig.
“Gyda TrC, byddwn yn dangos i bobl ifanc beth sydd gan beirianneg ac adeiladu i’w gynnig mewn ffordd hwyliog a difyr.”

Gallwch gofrestru eich diddordeb ar gyfer sesiynau yn y dyfodol drwy gysylltu ag engagement@tfw.wales. Oherwydd y cyfyngiadau COVID presennol, bydd digwyddiadau eleni yn cael eu cynnal ar-lein yn unig.