28 Gor 2022

Cynghorir teithwyr rheilffordd i beidio â theithio oni bai bod eu taith yn hanfodol ar nifer o lwybrau ddydd Sadwrn (30 Gorffennaf) oherwydd gweithredu diwydiannol.

Nid yw Trafnidiaeth Cymru (TrC) yn rhan o weithredu diwydiannol dydd Sadwrn gan aelodau o undeb y gyrwyr trenau ASLEF, ond mae rhai o’i wasanaethau’n debygol o fod yn hynod o brysur o ganlyniad i’r amserlen gyfyngedig iawn a roddwyd ar waith gan weithredwyr eraill.

Disgwylir i wasanaethau TrC ar Brif Linell De Cymru rhwng Abertawe a Chasnewydd fod yn brysur iawn oherwydd nad yw Great Western Railway (GWR) yn rhedeg unrhyw un o'i wasanaethau rhwng Caerdydd ac Abertawe, a gwasanaeth cyfyngedig iawn rhwng Caerdydd a Chasnewydd ddydd Sadwrn.  Bydd Trafnidiaeth Cymru yn rhedeg gwasanaethau ychwanegol ar hyd y llwybr hwn er mwyn creu mwy o le.

Bydd gwasanaethau rhwng Amwythig a Birmingham, lle mae Gemau'r Gymanwlad 2022 yn cael eu cynnal, hefyd yn arbennig o brysur gan na fydd West Midlands Railway yn rhedeg unrhyw un o'i wasanaethau ychwaith ddydd Sadwrn.

Mae TrC yn cynghori cwsmeriaid i beidio â theithio oni bai bod eu taith yn hanfodol rhwng:

• Abertawe a Chasnewydd
• Amwythig a Birmingham.

Bydd staff ychwanegol ar gael yn ein gorsafoedd i helpu cwsmeriaid.

Cynghorir pob cwsmer yn gryf i wirio'r wybodaeth deithio ddiweddaraf ar wefan TrC, ap ffon neu ar y sianeli cyfryngau cymdeithasol cyn teithio.