23 Gor 2021

Mae prosiect i roi hwb i fioamrywiaeth yn neuadd bentref Ffynnon Taf wedi cael ei lansio gan Trafnidiaeth Cymru ac Alun Griffiths, y prif gontractwr peirianneg sifil ac adeiladu.

Ddydd Sadwrn (17 Gorffennaf) gosodwyd 10 o botiau blodau mawr a blychau chwilod a bywyd gwyllt wrth y neuadd bentref gan wirfoddolwyr o’r gymuned leol a staff o TrC ac Alun Griffiths.

Dywedodd Mike Phillips, cadeirydd neuadd bentref Ffynnon Taf: “Mae hwn yn brosiect gwych a’r peth gorau un yw bod y gymuned yn cymryd rhan ynddo.

“Mae’n gymuned wych yma yn Ffynnon Taf. Mae llu o wirfoddolwyr wedi bod yn ein helpu. Mae pobl wedi bod yn dod yma ddydd ar ôl dydd ac yn rhoi o’u hamser dim ond i’n helpu ni.

“Mae’n debyg y bydd hyn yn para am y ddau fis nesaf a bob dydd Sadwrn bydd rhywun yma. Os oes gan rywun hanner awr yn sbâr, grêt!”

Mae’r prosiect yn rhan o gynllun ehangach gan TrC sydd wedi’i ddylunio i gefnogi gwelliannau bioamrywiaeth mewn 22 o orsafoedd ar draws y rhwydwaith yng Nghymru, ac mewn pum ardal gymunedol sy’n agos at y gorsafoedd trenau hefyd, fel ffordd o uno llwybrau gwyrdd ar draws y rhwydwaith trenau.

Mae TrC wedi cael grant Lleoedd Lleol ar gyfer Natur gwerth £100,000 ar gyfer y prosiect gan Lywodraeth Cymru a’r Gronfa Dreftadaeth.

Dywedodd Dr Louise Moon, rheolwr prosiect ar gyfer cynaliadwyedd Trafnidiaeth Cymru: “Mae’r prosiect wedi cael ei ddylunio i gefnogi mwy o nodweddion bioamrywiaeth yn y neuadd, sydd ychydig i lawr y ffordd o’r orsaf drenau, i gefnogi pryfed peillio’n arbennig ac i annog pryfed peillio i ddefnyddio’r ardal hon.

“Bydd yn cefnogi natur ac yn rhoi llwybr mynediad iddynt rhwng tirwedd yr orsaf a’r rheilffordd a’r gymuned ehangach.”

Dyma’r ail brosiect y bydd Alun Griffiths wedi’i gwblhau yn Ffynnon Taf dros y misoedd diwethaf, ar ôl rhoi llawer iawn o bren ar gyfer meinciau a photiau blodau yng Ngardd Goffa Ffynnon Taf ar ôl iddyn nhw golli eu holl ddodrefn pren mewn llifogydd.

Ychwanegodd Terry Davies, swyddog cyswllt cyhoeddus Alun Griffiths Construction ar yr is-adran rheilffyrdd: “Mae Alun Griffiths yn falch iawn o fod yn gysylltiedig â Trafnidiaeth Cymru a neuadd bentref Ffynnon Taf ac yn falch o helpu gyda’r prosiect bioamrywiaeth gwych hwn i helpu’r gymuned.

“Fe wnaethon ni adeiladu potiau blodau mawr yn ein safle yn Ffynnon Taf, dod â nhw draw ac mae’r gymuned wedi bod yn help enfawr.

“Rydyn ni’n falch iawn o helpu drwy ddarparu’r potiau blodau ar gyfer y prosiect hwn.”