28 Ion 2025
Fel hwb mawr i deithwyr, cyflwynir tocynnau integredig a thocynnau bws fforddiadwy ar draws llwybr T6 TrawsCymru a’r gwasanaethau 62 a 64 lleol o 2 Chwefror.
Nod y diweddariadau hyn yw gwneud teithio'n fwy cyfleus a chost-effeithiol, gyda theithwyr bellach yn gallu teithio yn ddi-dor rhwng llwybrau gan ddefnyddio un tocyn.
Gan weithio ar y cyd, mae Trafnidiaeth Cymru, Cyngor Sir Powys ac Adventure Travel yn cyflwyno'r strwythur prisiau newydd hwn sy'n cynnwys tocynnau o-un-pen-i’r-llall o'r gwasanaethau bws lleol (62 a 64) i’r llwybr T6, gan ddarparu opsiynau teithio haws i deithwyr i gyrchfannau gwahanol, gan gynnwys Aberhonddu, Castell-nedd, Abertawe a thu hwnt. Gyda chyflwyniad prisiau is, parthau prisiau safonol newydd ac amrywiaeth o docynnau aml-daith newydd, gall cwsmeriaid bellach deithio mewn ffordd fwy fforddiadwy ac effeithlon ar draws y rhanbarth.
Nodweddion allweddol y system docynnau newydd
Tocynnau cwbl integredig: Gall teithwyr deithio rhwng llwybrau T6, 62 a 64 gydag un tocyn, gan ganiatáu tocynnau o-un-pen-i’r-llall o'r llwybr 62 (Banwen - Ystradgynlais) a’r llwybr 64 (Rhydaman - Ystradgynlais) i’r gwasanaeth T6 tua’r gogledd i Aberhonddu neu tua’r de i Gastell-nedd/Abertawe, ac i'r gwrthwyneb.
Tocynnau newydd rhwng llwybrau 62 a 64: Gall teithwyr nawr deithio gydag un tocyn rhwng unrhyw ddau leoliad ar y llwybrau hyn, gan wneud teithio rhwng gwasanaethau yn haws nag erioed.
Prisiau is ar gyfer tocynnau unffordd: Gall teithwyr nawr elwa o brisiau tocynnau unffordd a osodir ar oddeutu 50% o'r pris dwyffordd cyfatebol, gan leihau’r gost o deithio ar y tri gwasanaeth yn sylweddol.
Parth prisiau safonol Ystradgynlais: Bydd pob taith sengl o fewn parth Ystradgynlais yn costio £1.50 yn unig, gyda thocyn 7 diwrnod newydd ar gael ar gyfer teithio diderfyn o fewn y parth am £10.00.
Tocynnau Diwrnod Newydd T6 / 62 / 64 : Mae tocyn diwrnod newydd sy’n costio £8.00 yn darparu teithio diderfyn ar y tri gwasanaeth, sy'n berffaith i’r rhai sy’n teithio’n aml.
Bydd tocyn 7 diwrnod newydd ar gael am £28.00, a fydd yn cynnig opsiwn cost-effeithiol i deithwyr rheolaidd.
Tocyn Rover Diwrnod Powys: Mae'r tocyn Rover Diwrnod Powys poblogaidd yn parhau i fod ar gael am £9.00, sy’n rhoi mynediad i deithwyr at rwydwaith bws cyfan Powys, gan gynnwys y llwybrau T6, 62 a 64 sydd newydd eu hintegreiddio.
Gostyngiadau Plant a Phobl Ifanc: Bydd gostyngiad o 33% ar bob tocyn plentyn, gan gynnwys y rhai sydd â cherdyn Fy Ngherdyn Teithio i Bobl Ifanc, gan wneud teithio'n fwy fforddiadwy i deuluoedd.
Mae'r holl docynnau ar gael drwy ap TrawsCymru: Gall teithwyr brynu tocynnau diwrnod a thocynnau wythnos yn hawdd, gan gynnwys yr opsiynau integredig newydd, yn uniongyrchol drwy ap TrawsCymru er hwylustod ychwanegol.
Dywedodd Ian Robinson, Arweinydd Datblygu ar gyfer prisiau, tocynnau a modelu (bysiau) Trafnidiaeth Cymru: "Mae'r system docynnau newydd hon wedi'i chynllunio i ddarparu mwy o hyblygrwydd a gwneud teithio'n haws i gymudwyr lleol a chymudwyr sy’n teithio pellteroedd hirach. Trwy integreiddio llwybrau a gostwng prisiau, mae TrawsCymru, ynghyd â gwasanaethau lleol 62 a 64, yn parhau â'i hymrwymiad i drafnidiaeth gynaliadwy, fforddiadwy a hygyrch yn Ne Cymru."
Prisiau enghreifftiol
- Brynaman i Abertawe: £3.40 unffordd
- Aberhonddu i’r Coelbren: £3.70 unffordd
- Castell-nedd i Ystradgynlais: £2.20 unffordd
- Ystradgynlais i Abertawe: £2.80 unffordd
- Aberhonddu i Rydaman: £4.30 unffordd
Am ragor o wybodaeth
Ewch i wefan TrawsCymru neu lawrlwythwch ap TrawsCymru am fapiau llwybrau manwl, gwybodaeth ynglŷn ag amserlenni ac i brynu tocynnau'n uniongyrchol.
