25 Tach 2024
Mae TrC Ffeibr, rhwydwaith cyfanwerthol ffeibr llawn o'r radd flaenaf yn lansio heddiw, gan gynnig cyfle i gwmnïau ddarparu cysylltedd rhyngrwyd cyflym i gymunedau cymoedd De Cymru.
Wrth adeiladu Metro De Cymru a gwneud newidiadau enfawr i'r seilwaith er mwyn trydaneiddio'r rheilffordd yng nghymoedd De Cymru, manteisiodd Trafnidiaeth Cymru ar y cyfle i osod rhwydwaith ffeibr llawn ar yr un pryd.
Yn eiddo i Trafnidiaeth Cymru, mae TrC Ffeibr yn lansio heddiw ac mae'n cynnig rhwydwaith i Ddarparwyr Gwasanaethau Rhyngrwyd a chwmnïau telathrebu sy'n barod i gael ei gysylltu ag ef, fel y gallant gynnig gwasanaethau rhyngrwyd cyflym i gwsmeriaid.
Dywedodd Alexia Course, Prif Swyddog Masnachol TrC:
"Rydym yn hynod falch ac yn gyffrous i lansio TrC Ffeibr heddiw, i ddarparu rhwydwaith cyflym o'r radd flaenaf i gwmnïau ei ddefnyddio a'i werthu yng nghymunedau'r cymoedd.
"Rydym wedi bod yn gwneud gwaith isadeiledd enfawr yn y cymoedd, yn trydaneiddio'r rheilffordd fel rhan o Fetro De Cymru ac roedd hyn yn gyfle i ni hefyd adeiladu'r seilwaith ar gyfer rhwydwaith craidd cyflym.
"Mae prosiect Metro De Cymru yn ymwneud â chysylltu pobl yn gorfforol tra bod TrC Ffeibr yn ymwneud â chysylltu pobl yn y byd digidol. Yn TrC, rydym yn cyd-fynd yn llwyr â Deddf Llesiant Cenedlaethau'r Dyfodol (Cymru) ac mae'r is-fusnes newydd hwn yn atgyfnerthu ein hymrwymiad i wella bywydau pobl yng Nghymru."
Dywedodd Guy Reiffer, Rheolwr Gyfarwyddwr TrC Ffeibr:
"Dyma’r prosiect cyntaf o’i fath yn y diwydiant ac yn y DU – prosiect seilwaith rheilffyrdd sydd wedi arallgyfeirio a defnyddio’r hyn sydd eisoes wedi’i adeiladu i osod rhwydwaith ffeibr llawn sy’n gyflym ac sy’n gallu darparu’r rhyngrwyd.
"Rydyn ni'n gyffrous i lansio heddiw ac rydyn ni'n edrych ymlaen at weithio gyda chwmnïau telathrebu i ddarparu rhyngrwyd ffeibr llawn â lled band mawr i gymunedau sy'n anoddach eu cyrraedd.
"I bobl sy'n byw yn y cymoedd, bydd rhyngrwyd cyflym a alluogir gan ein cynnig ffeibr craidd yn agor cyfleoedd o ran ffordd o fyw a busnes." Ewch i'n gwefan am ragor o wybodaeth – https://ffeibr.cymru/
Nodiadau i olygyddion
Mae TrC Ffeibr yn fenter hyd braich newydd gan Trafnidiaeth Cymru.
Mae'r lansiad heddiw yn helpu i atgyfnerthu ymrwymiad Cymru i degwch — man lle gall unrhyw un gael mynediad at ryngrwyd o safon wych ar gyfer dibenion gwaith, hamdden a dysgu — er mwyn cysylltu’n hawdd ag eraill, beth bynnag fo'u hanghenion.
Y cyntaf o’i fath yn y Diwydiant a'r DU – mae TrC wedi creu eu his-fusnes masnachol hyd braich eu hunain i yrru'r cyfle hwn ymlaen a gwireddu'r manteision posibl i TrC ac economi Cymru.
Bydd ffurfio TrC Ffeibr yn galluogi buddsoddiad sylweddol o'r tu allan i'r rhanbarth gan y bydd busnesau nawr yn gallu mwynhau cysylltedd digidol lled band uchel mwyaf blaenllaw’r byd - gan ddenu popeth o ganolfannau data, y sector deallusrwydd artiffisial, gweithgynhyrchu, cynhyrchu ffilm a theledu ar raddfa fawr a diwydiannau cenhedlaeth nesaf eraill.
Dylai hefyd gefnogi’r nod o leihau ardaloedd o dlodi digidol yn Ne Cymru a chyfrannu at ddatblygiad economaidd rhanbarthol.
