12 Gor 2024

Mae Trafnidiaeth Cymru ar genhadaeth i gael mwy o bobl i gerdded, beicio a olwynio o gwmpas Cymru ac wedi lansio pecyn cymorth hyrwyddo i helpu.

Mae ystadegau diweddar yn dangos bod 58% o oedolion yn cerdded deg munud a 6% yn beicio unwaith yr wythnos neu fwy i gyrraedd rhywle yng Nghymru. Byddai’n well gan 78% o blant ysgol gynradd deithio’n llesol i gyrraedd yr ysgol – fodd bynnag roedd 51% fel arfer yn teithio mewn car.

Er mwyn helpu i hybu'r ffigurau hyn ac annog mwy i deithio'n gynaliadwy pan allant, Mae Trafnidiaeth Cymru wedi lansio pecyn cymorth  sy’n hyrwyddo cerdded, teithio ar olwynion a beicio, wedi’i ddatblygu ar y cyd ag awdurdodau lleol a’i greu ar eu cyfer. 

Mae'r pecyn cymorth yn galluogi awdurdodau lleol i gael mynediad at ddeunyddiau hyrwyddo newydd ac mae'n cynnwys banc o dros 500 o ddelweddau o bobl yn cerdded, teithio ar olwynion a beicio yng Nghymru. Ei nod yw helpu awdurdodau lleol i hyrwyddo llwybrau cerdded a beicio yn eu hardal, gan helpu mwy o bobl i fanteisio arnynt. 

Mae ymchwil yn dangos bod y delweddau a'r iaith a ddefnyddir wrth siarad â phobl am gerdded a beicio yn bwysig. Trwy ddangos amrywiaeth eang o brofiadau beicio bob dydd, nod y pecyn cymorth yw herio canfyddiadau pobl ynghylch y math o berson mae’n rhaid bod er mwyn gallu beicio a dangos ei fod yn hawdd ac ar gael i bawb. 

Mae'n cynnwys syniadau ar gyfer negeseuon allweddol sy'n gweithio orau gyda gwahanol grwpiau ac enghreifftiau o ymgyrchoedd sydd wedi profi’n effeithiol, gan gynnwys astudiaethau achos o gynlluniau cerdded a beicio eraill yng Nghymru. 

Dywedodd Nicola Grima, Arweinydd Cynllun Cyflawni Teithio Llesol Trafnidiaeth Cymru:  

"Mae gan Gymru isadeiledd cerdded a beicio gwych. Rydym am i gymaint o bobl â phosibl ei ddefnyddio. Dyna pam rydyn ni wedi bod yn gweithio gydag awdurdodau lleol i roi'r offer iddyn nhw allu mynd ati i roi gwybod i bobl yn eu cymunedau am y llwybrau hyn a’u hannog i’w defnyddio." 

Mae un astudiaeth achos sydd wedi'i chynnwys yn y pecyn cymorth yn edrych ar seilwaith a gyflwynwyd ar Lwybr Beicio Cenedlaethol 5 gan Gyngor Bwrdeistref Sirol Conwy, a ariennir gan Lywodraeth Cymru. 

Mae un arall yn tynnu sylw at y gwelliannau a wnaed i bont Gladstone a Chogan ym Mro Morgannwg, a ariennir hefyd gan Lywodraeth Cymru.