11 Medi 2023

Mae’n bleser gan Menywod Mewn Trafnidiaeth gyhoeddi mai Marie Daly yw Cadeirydd newydd yr elusen.

Mae Marie wedi gweithio yn y sector rheilffyrdd ers dros 13 mlynedd a’i swydd bresennol yw Prif Swyddog Cwsmeriaid a Diwylliant Trafnidiaeth Cymru.

Dywedodd Marie, a ddechreuodd swydd y Cadeirydd yn swyddogol heddiw (11 Medi): “Rwyf wrth fy modd ac yn falch iawn o gael y cyfle i fod wrth galon sefydliad mor uchel ei barch a gwerthfawr, a diolch i’r Ymddiriedolwyr am roi eu hyder yn ynof fi. 

“Cafodd Menywod Mewn Trafnidiaeth ei sefydlu i wella cydbwysedd rhwng y rhywiau, amrywiaeth a chynhwysiant yn niwydiant rheilffyrdd y DU, ac rydyn ni’n parhau i weithio i fynd i’r afael â thangynrychiolaeth menywod ar draws pob lefel o’r sbectrwm gyrfa.

"Rwy'n edrych ymlaen at lywio a dylanwadu ymhellach ar ein gwaith pwysig, yn enwedig mewn cyfnod mor heriol, ond cyffrous, i'r sector."

Wrth groesawu Marie, dywedodd Is-gadeirydd Menywod Mewn Trafnidiaeth, Shona Clive: “Mae Menywod Mewn Trafnidiaeth yn parhau i fod yn fywiog a blaengar er lles y sector rheilffyrdd, ac rwy’n edrych ymlaen at gefnogi Marie yn ei rôl newydd. 

Dydy Menywod mewn Trafnidiaeth ddim ar gyfer menywod yn unig – mae Menywod mewn Trafnidiaeth ar gyfer y diwydiant rheilffyrdd i gyd. Drwy groesawu amrywiaeth a chynhwysiant, rydyn ni’n creu dyfodol cryfach i’r rheilffyrdd, lle mae gan bawb gyfle cyfartal i ffynnu.  Ymunwch â ni ar y daith gyffrous hon wrth i ni ail-lunio’r diwydiant rheilffyrdd a’i wneud yn gymuned fwy bywiog a chynhwysol i bawb.”

Sefydlwyd Menywod mewn Trafnidiaeth yn 2012, i wella amrywiaeth yn niwydiant rheilffyrdd y DU drwy ddarparu cyfleoedd rhwydweithio a chefnogaeth i bob menyw yn y sector, annog cwmnïau a rhanddeiliaid i fabwysiadu amrywiaeth fel strategaeth fusnes, a llunio mentrau sydd â’r nod o edrych ar ddewis gyrfa ym myd rheilffyrdd fel dewis deniadol i bobl ifanc.