24 Ebr 2025

Mae Trafnidiaeth Cymru (TrC) yn lansio ap tanysgrifiadau a theyrngarwch newydd sy'n gwobrwyo teithwyr am eu teithiau ar wasanaethau TrC.

Gan ddechrau ddoe (23 Ebrill), dechreuodd ap JurnyOn gynnig llu o fanteision i deithwyr TrC gan gynnwys gostyngiadau ar docynnau trên Advance a'r cyfle i ennill pwyntiau teyrngarwch am y milltiroedd a deithiwyd ar wasanaethau TrC.

Gyda chynlluniau tanysgrifio yn dechrau o £ 1.90 y mis yn unig, mae'r ap wedi'i gynllunio i wneud teithio yn fwy gwerth chweil a fforddiadwy i bawb.

Nodweddion allweddol yr ap JurnyOn:

• Ennill Pwyntiau am Bob Milltir: Gall teithwyr ennill 1 pwynt am bob milltir y maent yn teithio ar wasanaethau trên TrC, ni waeth a oes ganddynt danysgrifiad. Gellir defnyddio’r pwyntiau hyn, sydd werth 1c yr un, i ennill gwobrau o fewn yr ap neu eu defnyddio i leihau cost eu tanysgrifiad misol.
• Haenau Tanysgrifio Hyblyg: Mae'r ap JurnyOn yn cynnig tair haen tanysgrifio wahanol - Arian, Aur, a Phlatinwm - pob un yn cynnig gostyngiadau cynyddol ar docynnau trên Advance TrC. Mae tanysgrifwyr arian yn mwynhau gostyngiad o 10%, tanysgrifwyr Aur yn derbyn gostyngiad o 15%, ac mae tanysgrifwyr Platinwm yn elwa o ostyngiad hael o 35%.
• Fforddiadwy a Hygyrch: Gyda chynlluniau tanysgrifio yn dechrau ar ddim ond £1.90 y mis, mae'r ap JurnyOn yn sicrhau y gall pob teithiwr fanteisio ar y rhaglen teyrngarwch a mwynhau arbedion sylweddol ar eu teithiau.

Mae TrC wedi ffurfio partneriaeth â JurnyOn i ddarparu’r cynllun peilot hwn ac mae'n bwriadu ehangu'r cynnig i gynnwys mwy o gynigion tocynnau ac arbedion i gwsmeriaid yn y dyfodol.

Fel y Cwmni Trenau (TOC) cyntaf i gyflwyno system ddisgowntiau sy'n seiliedig ar danysgrifiad yn y DU, mae TrC yn gyffrous am yr hyn y bydd y cynllun hwn yn ei gynnig i gwsmeriaid ac mae'n anelu at annog mwy o bobl i ddefnyddio trafnidiaeth gyhoeddus.

Dywedodd Alexia Course, Prif Swyddog Masnachol Trafnidiaeth Cymru:

“Rydym wrth ein bodd o gael ffurfio partneriaeth â JurnyOn i gyflwyno'r cynnig arloesol hwn i'n cwsmeriaid, gan wobrwyo eu teyrngarwch parhaus i'n gwasanaethau.

"Mae'r fenter hon wedi datblygu’n gyflym oherwydd ymroddiad ein timau Labordy Arloesi a Thwf Rhwydwaith. Mae'n enghraifft o sut mae ein timau'n cydweithio'n effeithiol â phartneriaid fel JurnyOn ac yn defnyddio eu hatebion technolegol unigryw i arwain llwyddiant cyntaf o’i fath arall i ddiwydiant rheilffyrdd y DU."

Dywedodd Divya Prashanth, Prif Swyddog Gweithredol JurnyOn:

"Yn JurnyOn, rydym wrth ein bodd ein bod wedi llunio partneriaeth â Trafnidiaeth Cymru.

"Gyda'n gilydd, rydym yn ail-ddychmygu trafnidiaeth gyhoeddus trwy gynlluniau arloesol sydd wir yn gwasanaethu pobl. O'n ap tocynnau sy’n defnyddio deallusrwydd artiffisial sy'n seiliedig ar danysgrifiadau ac yn symleiddio strwythurau prisiau cymhleth, i waled blockchain gyntaf y byd ar gyfer symudedd, ein nod yw gwneud teithio yn hygyrch, yn reddfol ac yn fforddiadwy i bawb. "

Mae TrC yn gwahodd pob teithiwr i lawrlwytho'r ap JurnyOn a dechrau ennill gwobrau heddiw. Mae'r bartneriaeth arloesol hon yn gam sylweddol tuag at wella'r profiad teithio i bobl a darparu mwy o werth i gwsmeriaid TrC.

Sut i ddechrau gyda JurnyOn?

1. Lawrlwythwch yr ap JurnyOn o'r iOS App Store (bydd fersiwn ar gyfer Android yn cael ei gynnwys fel rhan o'r cynllun ehangu arfaethedig).
2. Crëwch gyfrif yn yr ap JurnyOn
3. Prynwch un o dair haen tanysgrifiad (Arian, Aur, Platinwm)
4. Prynwch eich tocyn trên TrC Advance trwy'r ap JurnyOn a derbyn gostyngiad yn seiliedig ar eich haen tanysgrifiad
5. Enillwch bwyntiau teyrngarwch i'ch cyfrif JurnyOn yn seiliedig ar y milltiroedd a deithiwyd ar wasanaethau TrC
6. Defnyddiwch eich pwyntiau teyrngarwch yn yr ap JurnyOn i ennill gwobrau gwych neu i wrthbwyso cost eich ffi tanysgrifio fisol nesaf.