21 Tach 2024
Mae Trafnidiaeth Cymru ymhlith grŵp blaenllaw o sefydliadau sy'n mynd y tu hwnt i’r meincnod o gael 5% o'u gweithlu wedi cofrestru mewn rhaglenni "gweithio a dysgu."
Mae'r gydnabyddiaeth yn amlygu ymrwymiad TrC i rymuso gweithwyr drwy fentrau "gweithio a dysgu" fel Prentisiaethau, Cynlluniau i Raddedigion, a Lleoliadau Gwaith i Fyfyrwyr a Noddir.
Mae'r Clwb 5% yn sefydliad blaenllaw i gyflogwyr ag aelodaeth sydd wedi ymrwymo i greu llwybrau er mwyn i hybu twf proffesiynol a meithrin gweithleoedd mwy cynhwysol, amrywiol a hygyrch.
Er mwyn ennill Aelodaeth Aur, mae sefydliadau'n mynd drwy broses Archwilio Cyflogwyr drylwyr sy'n asesu eu hymdrechion yn fanwl o ran eu rhaglenni "gweithio a dysgu," eu dyheadau ar gyfer y dyfodol a’u hymroddiad i symudedd cymdeithasol, amrywiaeth a chynhwysiant.
Roedd TrC ymhlith grŵp o 119 o gyflogwyr a oedd yn bodloni'r safonau trylwyr hyn.
Dywedodd llefarydd ar ran Trafnidiaeth Cymru:
"Pleser o’r mwyaf yw bod yn Aelod Aur o'r Clwb 5% am yr ail flwyddyn yn olynol.
"Mae'r gydnabyddiaeth hon yn dyst o'n hymrwymiad i greu llwybrau ar gyfer twf proffesiynol, gan ddarparu’r sgiliau a'r hyder sydd eu hangen ar ein staff i ffynnu.
"Rydym yn edrych ymlaen at adeiladu ar y llwyddiant hwn yn y blynyddoedd i ddod."
Dywedodd Mark Cameron OBE, Prif Weithredwr y Clwb 5%:
"Rydym yn hynod falch o'r cyflogwyr rhagorol, fel Trafnidiaeth Cymru, sydd wedi mynd y tu hwnt i’r gofyn er mwyn buddsoddi yn nyfodol eu gweithlu drwy amrywiaeth eang o fentrau ‘gweithio a dysgu'.
“Mae eu hymroddiad, yn enwedig yn ystod y cyfnod heriol hwn, yn haeddu cael ei ddathlu. Drwy ennill aelodaeth Aur, mae Trafnidiaeth Cymru wedi dangos ymrwymiad eithriadol i siapio sgiliau’r dyfodol, gan gyfrannu nid yn unig at eu busnes ond at yr economi ehangach."
Mae TrC yn annog unrhyw un sydd â diddordeb yn yr amrywiaeth eang o gyfleoedd sydd ar gael i fynd i’r wefan https://trc.cymru/gwybodaeth/ceiswyr-swyddi/ein-swyddi-gwag
I gael rhagor o wybodaeth am y Clwb 5%, ewch i https://www.5percentclub.org.uk/
Nodiadau i olygyddion
- Mae'r Clwb 5% yn gweithio gyda chyflogwyr y DU a dylanwadwyr allweddol i’w hysbrydoli i gymryd camau cadarnhaol er mwyn cynyddu cyfleoedd dysgu yn y gweithle yn ogystal â chyfleoedd dysgu hygyrch, gan ganolbwyntio'n bennaf ar nifer y prentisiaid, myfyrwyr noddedig a graddedigion a gyflogir. Nod y Clwb 5% yw cynyddu rhagolygon o ran cyflogaeth a gyrfaoedd i bobl ifanc heddiw a darparu’r gweithlu medrus sydd ei angen ar y DU i ddiogelu economi Prydain. Lansiwyd y Clwb 5% yn 2013.
- Mae aelodau'n llofnodi siarter y Clwb 5%. Fel aelod o'r Clwb 5%, mae cyflogwyr yn datgan eu bod: Wedi ymrwymo i helpu agenda twf y DU ac yn cydnabod bod datblygu pobl yn hanfodol bwysig, o safbwynt busnes ac o safbwynt cymdeithasol; Chwarae eu rhan wrth fynd i'r afael â diweithdra ymhlith pobl ifanc a phrinder sgiliau; Addo i weithio tuag at gael o leiaf 5% o'u gweithlu yn y DU wedi cofrestru ar brentisiaeth ffurfiol, yn fyfyrwyr noddedig a/neu ar gynlluniau datblygu graddedigion o fewn pum mlynedd; Mesur ac adrodd ar eu cynnydd yn flynyddol yn erbyn y metrig uchod yn adran Cyfrifoldeb Cymdeithasol Corfforaethol eu Hadroddiad Blynyddol a'r Cyfrifon neu ddogfen gyfwerth; Wedi ymrwymo i annog cyflogwyr eraill i gymryd rhan yn yr ymgyrch.
- Mae aelodaeth y Clwb 5% yn cynnwys mwy na 1,100 o sefydliadau o bob math o sectorau gwahanol a chwmnïau sy’n amrywiol o ran maint, gan gynnwys corfforaethau mawr yn ogystal â busnesau bach a chanolig. Mae cyfanswm y gweithwyr a gynrychiolir bellach yn fwy na 1.9m, gyda thua 108,00 yn gwneud cynlluniau "gweithio a dysgu."
