05 Awst 2026

Bydd technoleg newydd yn cael ei chyflwyno mewn saith gorsaf ar draws rhwydwaith Cymru a’r Gororau yr haf hwn i wella hygyrchedd, cymorth i gwsmeriaid a gweithrediadau’r gorsafoedd. 

Bydd y gwaith hwn yn cynnwys cyflwyno gatiau tocynnau wedi'u moderneiddio, dyfeisiau tabled i gydweithwyr a mannau cymorth rhyngweithiol newydd sy’n defnyddio fideo wedi'u gosod yng ngorsafoedd Caerdydd Heol y Frenhines, Castell-nedd, Abertawe, y Rhyl, Caer, Amwythig a Chasnewydd.

Wedi'i gynllunio i wneud mynediad i orsafoedd yn haws ac yn fwy hygyrch, mae'r prosiect yn cyfuno gatiau wedi'u moderneiddio â chefnogaeth well ar lawr gwlad i gadw teithwyr yn symud yn rhwydd fel rhan o fuddsoddiad parhaus Trafnidiaeth Cymru (TrC) mewn seilwaith gorsafoedd.

Dywedodd Darren Haynes, Pennaeth Gweithrediadau Cwsmeriaid Trafnidiaeth Cymru: “Bydd y buddsoddiad hwn ar draws saith o’n prif orsafoedd yn gwella gweithrediadau dyddiol y gorsafoedd hyn yn sylweddol ac yn gwella profiad y teithwyr.

“Mae’r diweddariadau hyn wedi’u cynllunio i wneud pob taith yn rhwyddach wrth ddarparu offer modern i’n cydweithwyr rheng flaen er mwyn sicrhau bod ein gorsafoedd yn parhau i fod yn groesawgar ac yn hygyrch i bawb.”

Bydd y gwaith yn digwydd dros bum niwrnod ym mhob lleoliad rhwng dydd Llun 3 Awst a dydd Iau 1 Hydref.
Yn ystod y broses o osod a chomisiynu’r dechnoleg hon, ni fydd y gatiau newydd yn cael eu defnyddio tra bod profion cynhwysfawr yn cael eu cwblhau. Bydd teithwyr yn dal i allu teithio fel arfer, gyda chydweithwyr yn yr orsaf yn cynnal archwiliadau tocynnau â llaw.

Cynghorir teithwyr sy'n defnyddio taliadau digyswllt talu wrth fynd i dapio i mewn bob amser wrth fynd i mewn i’r orsaf a thapio allan wrth adael. Gall methu â thapio allan arwain at dâl am daith anghyflawn, er y gellir cywiro unrhyw fanylion coll yn hawdd trwy ap TrC neu gyfrif ar-lein.