09 Ion 2026

Anogir teithwyr i wirio cyn teithio ddydd Gwener 9 Ionawr wrth i dimau Network Rail a Trafnidiaeth Cymru barhau i weithio o gwmpas y cloc i glirio llwybrau, archwilio seilwaith ac adfer gwasanaethau'n ddiogel yn dilyn y storm.

Daeth Storm Goretti â chyflyrau difrifol ar draws llwybr Cymru a'r Gororau, gan gynnwys mannau wedi rhewi, eira wedi'i gywasgu ar draciau, coed wedi disgyn a methiannau pŵer mewn sawl lleoliad. Er na chafodd rhai llwybrau eu heffeithio'n uniongyrchol, newidiwyd gwasanaethau a chaewyd rhannau o'r rhwydwaith dros dro fel rhan o ddull sy'n cael ei arwain gan ddiogelwch, yn unol â chyngor y Swyddfa Dywydd.

Er bod llawer o lwybrau bellach wedi ailagor, cynghorir teithwyr y bydd effeithiau gweddilliol ar wasanaethau drwy gydol gweddill dydd Gwener wrth i dimau barhau â gwaith adfer a dychwelyd y rhwydwaith i weithrediad llawn yn ddiogel. Bydd rhai gwasanaethau gael eu gohirio, eu diwygio neu eu canslo ar fyr rybudd o hyd.

Cynghorir teithwyr yn gryf i wirio cyn teithio gan y gallai rhywfaint o aflonyddwch barhau drwy gydol dydd Gwener 9 Ionawr, wrth i waith adfer barhau.

Disgwylir i darfu ar linell Calon Cymru a rhwng Amwythig a Birmingham barhau tan ddydd Sadwrn 10 Ionawr.

Mae gwybodaeth gyfoes am wasanaethau rheilffordd ar gael yma:  Pob diweddariad | Trafnidiaeth Cymru

Mae cydweithwyr Network Rail yn parhau ledled y wlad yn clirio'r eira, cael gwared ar falurion, atgyweirio namau a chynnal archwiliadau.

Dywedodd Nick Millington, Cyfarwyddwr Llwybr Network Rail Cymru a'r Gororau, “Daeth Storm Goretti ag amodau heriol iawn ar draws y llwybr, gan gynnwys eira trwm, gwyntoedd cryfion a thymheredd rhewllyd, a arweiniodd at broblemau mewn sawl lleoliad. Mae ein timau wedi gweithio'n ddiflino drwy'r nos ac maent yn parhau heddiw i glirio llinellau, atgyweirio difrod ac archwilio'r rheilffordd fel y gall gwasanaethau ailgychwyn yn ddiogel.

“Er bod llawer o'r rhwydwaith bellach yn ailagor, bydd rhywfaint o aflonyddwch parhaus heddiw wrth i ni gwblhau gwaith adfer a dychwelyd y rheilffordd i wasanaeth llawn. Hoffwn ddiolch i deithwyr am eu hamynedd ac i'n cydweithwyr a'n partneriaid am eu gwaith caled mewn amodau anodd iawn.”

Ychwanegodd Patrick Allinson, Pennaeth Gweithrediadau Rheoli yn Trafnidiaeth Cymru, "Rydym yn falch o fod yn adfer gwasanaethau yn dilyn Storm Goretti, a hoffem ddiolch i'n cydweithwyr a'n teithwyr am eu dealltwriaeth.

“Parhewch i wirio cyn i chi deithio a chaniatewch amser ychwanegol ar gyfer eich taith. Cymerwch ofal wrth deithio i ac o orsafoedd gan y gallai rhai arwynebau fod yn llithrig o hyd.”

Ychwanegodd Nick Westcott, Cyfarwyddwr Cyflenwi Gwasanaethau CrossCountry: “Mae Storm Goretti wedi cael effaith sylweddol ar rwydwaith CrossCountry, yn enwedig ar draws Gorllewin Canolbarth Lloegr, ac mae’r 24 awr ddiwethaf wedi bod yn heriol i gwsmeriaid a chydweithwyr. Arweiniodd eira trwm yn ardal Birmingham at sawl trên i fod yn sownd gan atal mynediad i’n depo, sy’n golygu nad oedd llawer o drenau’n gallu ail-lenwi â thanwydd dros nos. Mae anawsterau parhaus i griwiau sy’n teithio i Birmingham wedi effeithio ymhellach ar weithrediadau.

“O ganlyniad, mae gwasanaethau heddiw wedi’u tarfu’n ddifrifol. Ar hyn o bryd nid oes unrhyw wasanaethau’n gweithredu o Birmingham tuag at Fanceinion, Nottingham na Chaerdydd, gyda dim ond gwasanaeth cyfyngedig yn rhedeg ar lwybrau eraill. Mae ein timau’n gweithio o gwmpas y cloc gyda Network Rail i reoli effeithiau’r storm wrth gynnal gwasanaeth diogel. Cynghorir cwsmeriaid yn gryf i wirio cyn teithio."

Mae tocynnau trên ar gyfer dydd Iau 8 Ionawr yn parhau i fod yn ddilys i deithio hyd at ddydd Sul 11 ​​Ionawr.