04 Maw 2026

Mae Trafnidiaeth Cymru (TrC) wedi helpu 75,339 o deithwyr i deithio'n hyderus yn 2024/25, pobl na fyddant fel arall wedi teithio o gwbl heb gefnogaeth y gwasanaeth Cymorth i Deithwyr.

Mae'r ffigur yn cynrychioli cynnydd o 23% ar y flwyddyn flaenorol a dyma'r nifer uchaf o geisiadau am gymorth a gofnodwyd ar rwydwaith Cymru a'r Gororau, gan adlewyrchu ymrwymiad TrC i wneud y rheilffyrdd yn hygyrch i bawb.

Dywedodd Jo Foxall, Cyfarwyddwr Profiad Cwsmeriaid Trafnidiaeth Cymru: “Rydym am helpu i wneud trafnidiaeth gyhoeddus yn hawdd ei defnyddio ac yn hygyrch i bawb ac mae ein gwasanaeth cymorth i deithwyr yn un ffordd o wneud hynny.

“Rydym am i bobl deimlo'n hyderus i deithio a dengys y ffigurau hyn bod mwy a mwy o bobl yn cael mynediad at y cymorth sydd ar gael.

“Mae ein Cynghorwyr Gwasanaethau Cwsmeriaid yn defnyddio dull hyblyg o gefnogi cwsmeriaid, sydd wedi arwain at adborth gwych ar y cymorth â gaiff cwsmeriaid.”

Mae'r gwasanaeth Cymorth i Deithwyr ar gael i'r holl gwsmeriaid sydd angen cymorth ychwanegol i gyflawni eu taith yn ddiogel ac yn ddi-drafferth. Mae staff wedi'u hyfforddi i gynorthwyo teithwyr ag anableddau gweladwy ac anweladwy, gan helpu gyda chynllunio teithiau, prynu tocynnau, ac i fynd ar y trenau ac oddi arnynt. Gallant hefyd gynorthwyo gyda bagiau ar gyfer cwsmeriaid sydd ag anawsterau symudedd neu sydd â nam ar eu golwg, yn unol â chanllawiau National Rail.

Gall teithwyr drefnu cymorth hyd at ddwy awr cyn bod y tren yn gadael, ar unrhyw adeg o'r dydd. I'r rhai nad ydynt yn gallu archebu ymlaen llaw, bydd timau gorsafoedd a'r staff ar y tren bob amser yn gwneud eu gorau i ddarparu'r cymorth sydd ei angen.

Mae TrC hefyd wedi parhau i fuddsoddi mewn Mannau Newid newydd ac yn ddiweddar maent wedi paratoi y cyfleusterau hyn mewn gorsafoedd allweddol o amgylch y rhwydwaith yn Amwythig, Bangor, Caer a Chaerfyrddin.

Yn ogystal â Chymorth i Deithwyr, mae TrC yn cefnogi ystod o fentrau hygyrchedd gan gynnwys y Cynllun Waled Oren ar gyfer teithwyr sy'n ei chael hi'n anodd cyfathrebu ar drafnidiaeth gyhoeddus, y Cynllun Sunflower ac ap BSL i wneud trafnidiaeth gyhoeddus yn fwy hygyrch.

Mae TrC hefyd yn datblygu pecynnau synhwyraidd ac yn ehangu ei raglen hyfforddi staff i wella hygyrchedd ymhellach ar draws y rhwydwaith.