05 Rhag 2025

Mae Trafnidiaeth Cymru (TfW) a Heddlu Trafnidiaeth Prydeinig (BTP) yn cydweithio i wella diogelwch a chymorth i gwsmeriaid ar draws y rhwydwaith rheilffyrdd dros dymor y Nadolig eleni, gyda dychweliad Ymgyrch Genesis a Garland.

Bydd y fenter yn gweld swyddogion heddlu a staff rheilffordd ychwanegol yn cael eu defnyddio ar draws rhwydwaith rheilffyrdd Cymru a'r Gororau i ddarparu cefnogaeth weladwy, i gynorthwyo unrhyw un sydd angen help a chynnig cyngor diogelwch personol.

Bydd presenoldeb uwch o batrolau heddlu amlwg ar draws trenau a gorsafoedd, gyda chefnogaeth swyddogion mewn dillad plaen a fydd yn canolbwyntio ar fynd i'r afael ag aflonyddu rhywiol, ymddygiad gwrthgymdeithasol ac anhrefn sy'n gysylltiedig ag alcohol. 

Lansiwyd Ymgyrch Genesis a Garland gyntaf yn 2022 ac mae wedi dychwelyd i redeg drwy gydol mis Rhagfyr, gan ganolbwyntio ar ddydd Gwener a dydd Sadwrn pan fydd nifer y teithwyr ar eu huchaf.

Drwy gynyddu patrolau mewn lleoliadau allweddol, nod yr ymgyrch yw atal troseddu a thawelu meddyliau teithwyr yn ystod tymor prysur yr ŵyl.

Dywedodd Georgie Wills, Rheolwr Cyflenwi Cwsmeriaid a Chynllunio Digwyddiadau: “Mae tymor yr ŵyl yn un o gyfnodau prysuraf y flwyddyn a’n blaenoriaeth yw sicrhau bod cwsmeriaid yn teimlo’n ddiogel, yn cael eu cefnogi ac yn gallu teithio’n hyderus.

“Drwy gydweithio’n agos â Heddlu Trafnidiaeth Prydeinig a’n partneriaid diogelwch eto eleni, bydd yr ymgyrch hon yn rhoi tawelwch meddwl ychwanegol mewn gorsafoedd allweddol ac yn helpu i sicrhau bod pawb yn cyrraedd adref yn ddiogel i fwynhau’r Nadolig gyda’u hanwyliaid.”

Dywedodd Andy Morgan, Uwcharolygydd BTP Cymru: "Rydym yn gweithio ar y cyd â Trafnidiaeth Cymru i ddarparu cymaint o adnoddau â phosibl a bydd presenoldeb heddlu gweladwy drwy gydol cyfnod y Nadolig.

"Bydd Ymgyrch Genesis a Garland, a gyflwynir ochr yn ochr â staff a thîm diogelwch Trafnidiaeth Cymru, yn helpu i sicrhau bod pob teithiwr yn mwynhau taith ddiogel.

"Dymunwn Nadolig diogel a heddychlon i bob teithiwr."