23 Hyd 2026

Anogir cwsmeriaid sy'n teithio yn ardal Caerdydd i gynllunio a gwirio cyn teithio, wrth i Trafnidiaeth Cymru (TrC) gynnal gwaith uwchraddio seilwaith dros saith diwrnod ar lein Bae Caerdydd.

O ddydd Sadwrn 24 Hydref i ddydd Gwener 30 Hydref, ni fydd gwasanaethau rheilffordd yn rhedeg rhwng Caerdydd Heol y Frenhines a Bae Caerdydd.

Bydd cau’r lein dros dro yn galluogi peirianwyr i osod cledrau newydd i gefnogi gwelliannau i amserlenni yn y dyfodol ac i gynyddu amlder gwasanaethau ar lein Bae Caerdydd.

Mae'r buddsoddiad hwn yn rhan o raglen ehangach Metro De Cymru, sydd â'r nod o ddarparu rhwydwaith trafnidiaeth mwy dibynadwy, hygyrch ac integredig ar gyfer cymunedau ledled y rhanbarth.

Dywedodd Dan Tipper, Prif Swyddog Seilwaith yn Trafnidiaeth Cymru: "Trawsnewidiad Lein y Bae fydd yr uwchraddiad mwyaf i drafnidiaeth gyhoeddus yn ardal Trebiwt a Bae Caerdydd ers cenhedlaeth, ac mae'n rhan bwysig o Metro De Cymru."

Mae'r gwaith hwn ar y cledrau, gan gynnwys gosod traciau newydd, yn garreg filltir allweddol yn y trawsnewidiad hwnnw, a bydd yn helpu i baratoi'r ffordd ar gyfer gwelliannau o ran amlder gwasanaethau ar y lein yn y dyfodol.

"Rydym yn gwybod y bydd cau’r lein dros dro yn achosi anghyfleustra i rai cwsmeriaid, ac hoffem ddiolch iddynt am eu hamynedd a’u dealltwriaeth tra bod y gwaith hanfodol hwn yn cael ei wneud i wella dyfodol y llinell."

Mae prosiect trawsnewid Lein y Bae – sy'n rhan o drawsnewid ehangach Llinellau Craidd y Cymoedd ar gyfer y Metro – wedi cael ei ariannu'n rhannol gan Gronfa Datblygu Rhanbarthol Ewrop drwy Lywodraeth Cymru.