13 Ion 2023
Mae Trafnidiaeth Cymru wedi cymryd cam arall ymlaen yn rhoi Metro De Cymru ar waith drwy osod mwy na 6,500 metr o wifrau trydaneiddio uwchben dros y Nadolig.
Bydd Metro De Cymru yn gwella cysylltedd yn sylweddol ledled y rhanbarth a bu timau’n gweithio bob awr o’r dydd a’r nos, dros y gwyliau, i sicrhau bod gwaith mawr yn cael ei gwblhau.
Ynghyd â gosod gwifrau uwchben ar gyfer y trydan, gosododd y timau 250 o fastiau metel, pont droed newydd yng Nghwmcynon, dwy groesfan tanlwybr yn Heol y Frenhines Caerdydd ynghyd â phrofi system signalau newydd.
Hefyd, yn nepo Ffynnon Taf, a fydd yn gartref i drenau tramiau trydan newydd sbon yn y blynyddoedd i ddod, gwnaed gwaith sylweddol a gosodwyd 195 o byst tenau (sheet pile) yn Aberdâr ar gyfer platfform a dolen trac newydd.
Dywedodd Lee Waters, y Dirprwy Weinidog Newid Hinsawdd sy’n gyfrifol am Drafnidiaeth: “Hyd yn hyn, dyw llawer o’r gwaith sy'n cael ei wneud ar Fetro De Cymru - i raddau helaeth - ddim yn weladwy. Eleni a’r flwyddyn nesaf, bydd hyn yn newid.
“Dim ond y dechrau yw’r gwaith rhagorol a wnaed dros y Nadolig ar gyfres o gamau a fydd yn dod yn fwyfwy amlwg wrth i ni weithio tuag at ein nod o adeiladu system Metro newydd erbyn diwedd 2024. Mae’r prosiect hwn, sy'n werth tua £1 biliwn, yw prosiect peirianneg mwyaf a'r un mwyaf cymhleth sydd ar waith yng Nghymru a bydd yn gwneud gwahaniaeth gwirioneddol i gymunedau.”
Dywedodd Karl Gilmore, Cyfarwyddwr Seilwaith Rheilffyrdd TrC: “Yn gyntaf, hoffwn ddiolch i’n holl dimau a phartneriaid am eu gwaith dros y Nadolig,. Fe wnaethon nhw aberthu eu gwyliau er mwyn i ni allu datblygu Metro De Cymru.
“Hoffwn hefyd ddiolch i'n holl gymdogion ymyl y llinell am eu hamynedd a'u dealltwriaeth wrth i ni gwblhau'r gwaith uwchraddio hwn.
“Rydym wedi cyrraedd carreg filltir allweddol arall o ran cyflawni'r prosiect hwn ac rydym yn edrych ymlaen yn fawr at barhau i symud ymlaen yn 2023.
“Bydd Metro De Cymru yn trawsnewid y ffordd y mae pobl yn teithio ac yn darparu opsiwn mwy cynaliadwy i ddefnyddio'r car, gan gefnogi’r frwydr yn erbyn newid hinsawdd.”
Ariennir y prosiect yn rhannol gan Gronfa Datblygu Rhanbarthol Ewrop trwy Lywodraeth Cymru.
