16 Medi 2025
Mae system rhyngrwyd lloeren newydd yn cael ei threialu ar wasanaethau bysiau fflecsi Trafnidiaeth Cymru (TrC) ym Machynlleth, gan gysylltu teithwyr mewn ardaloedd gwledig.
Mae'r system newydd, wedi'i phweru gan rwydwaith o loerennau, yn darparu signal Wi-Fi dibynadwy, cyflym sy'n bwysig ar gyfer gwasanaethau ar alw fel fflecsi.
Mae technoleg yn gwella profiad y cwsmer trwy ddarparu diweddariadau amser real ar leoliadau bysiau ac yn cynnig Wi-Fi dibynadwy am ddim i deithwyr, hyd yn oed mewn ardaloedd anghysbell lle nad yw signalau symudol traddodiadol ar gael.
Mae'r cydweithrediad hwn rhwng Labordy Arloesi TrC, y gosodwyr Dragon WiFi, a'r gweithredwr Lloyds Coaches, yn dangos sut y gall technoleg arloesol wella hygyrchedd a dibynadwyedd trafnidiaeth gyhoeddus i bobl ledled Cymru.
Dywedodd Huw Morgan, Pennaeth Trafnidiaeth Integredig a Datblygu Rhwydwaith Bysiau: “Mae wedi bod yn wych gweld yr effaith gadarnhaol y mae’r dechnoleg newydd wedi’i chael ar brofiad y cwsmer. Mae’n hanfodol ein bod yn gallu darparu diweddariadau clir ar leoliadau bysiau, yn enwedig mewn ardaloedd mwy gwledig fel Machynlleth, lle mae fflecsi yn hanfodol i lawer.”
Ychwanegodd Naomi Colling, Uwch Reolwr Cynllunio a Datblygu fflecsi: “Mae’r treial hwn yn ymateb uniongyrchol i adborth cwsmeriaid am signal cellog gwael mewn ardaloedd gwledig.
“Rydym wedi ymrwymo i ddarparu gwasanaeth dibynadwy sy’n diwallu eu hanghenion yn wirioneddol, a byddwn yn adolygu adborth yn gyson drwy gydol y treial i sicrhau ein bod yn gwneud hynny.”
Dywedodd Guy Farley, Cyfarwyddwr yn DragonWiFi: “Mae’n wych bod TrC wedi dangos eu bod yn arloesol trwy ddefnyddio technolegau newydd. Mae mabwysiadu hyn yn gynnar gan TrC yn gosod Cymru fel arweinydd mewn trafnidiaeth gysylltiedig, gan ddangos arloesedd ac ymrwymiad gwirioneddol i dechnoleg newydd sy’n fuddiol i deithwyr a gweithrediadau.”
Bydd y treial yn parhau tan fis Mawrth 2026. Mae treial newydd hefyd i ddechrau yng Nghonwy gyda thechnoleg OneWeb i weld a all gael effaith gadarnhaol debyg ar ddefnyddwyr fflecsi.
