03 Rhag 2025

Ydych chi’n awyddus i siopa'n lleol ond ddim yn siŵr ble i ddechrau? Gall fflecsi eich tywys chi yno. O Sir Benfro i Brestatyn, mae digonedd o fusnesau bach i chi bori drwyddynt. 

P'un a ydych chi'n chwilio am lyfrau, bwyd cartref, gemwaith wedi'i wneud â llaw neu nwyddau cartref unigryw, fe ddewch chi o hyd iddynt gyda fflecsi.

Llanrwst

Ydych chi’n chwilio am yr anrheg berffaith i rywun sy'n dwlu ar fwyd? Ewch i'r deli lleol, Blas ar Fwyd. Yn llawn amrywiaeth o gawsiau lleol, siytnis, gwin a mwy, sbwyliwch eich hun neu anwylyn gyda rhodd o fwyd Cymreig. Mae'r deli hefyd yn darparu amrywiaeth o hamperi Nadolig arbennig, gan gynnig y danteithion perffaith i'w mwynhau dros gyfnod yr ŵyl.

Yn llawn anrhegion wedi'u gwneud â llaw mae Siop Sioned. O nodau tudalen a breichledau i brintiau lliwgar a matiau diodydd, mae digon i'w fwynhau yn y siop anrhegion hon. A oes chwant bwyd arnoch wedi’r holl siopa? Galwch heibio i Fecws Scilicorns lle gallwch fwynhau detholiad o ddanteithion Cymreig, o fara crystiog i gacennau bakewell.

Aberteifi

Ymgollwch yn yr iaith Gymraeg yn Awen Teifi, siop lyfrau sydd wedi bod yn rhan o gymuned Aberteifi ers 1999. Mae'r siop yn cadw llyfrau Saesneg a Chymraeg, sy’n berffaith ar gyfer y rhai sy’n medru’r iaith a'r rheini sy'n dymuno ei dysgu. Os ydych chi'n siopa gyda rhai bach neu'n chwilio am anrhegion i blant, porwch drwy’r amrywiaeth o deganau sydd ar gael yno, o dractorau i bosau jig-so.

Am brofiad busnes bach go iawn, ewch i Farchnad Neuadd y Dref Aberteifi. Yn llawn masnachwyr annibynnol, mae digon o stondinau gwahanol i siopa ynddynt. O waith celf wedi'i gomisiynu ar thema anifeiliaid anwes a gemwaith wedi'i wneud â llaw i focsys meze, dyma'r lle perffaith i siopa'n lleol.

Prestatyn

Yn adnabyddus fel siop fwtîc nwyddau cartref Prestatyn, ewch i The Twisted Tree & The Twisted Twig am drip siopa lleol moethus. Porwch drwy eu stoc Nadoligaidd yn ogystal â'u trysorau Cymreig arferol, o glustogau melfed i wydrau margherita. Darganfyddwch blethdorchau ffres, addurniadau unigryw ac anrhegion â thema robin goch a chofleidiwch naws y Nadolig.

Angen ychydig o gaffein a byrbryd sawrus wrth i chi grwydro? Ewch i Tu Mundo, caffi teuluol sy'n gweini coffi, brechdanau wedi’u tostio, baguettes a llawer mwy o ddanteithion blasus sydd wedi ennill gwobrau. Os ydych chi eisoes yn hoff o’r lle, beth am brynu taleb i'w rhoi fel anrheg yn hosan Nadolig ffrind neu aelod o’r teulu?

Rhuthun

Chwilio am brofiad siopa cynaliadwy? Ewch i Naturally Ethical, siop organig sydd wedi ymrwymo i wneud byw'n fwy gwyrdd yn fwy hygyrch. O ddillad a theganau plant i fwyd a diod, mae digon i'w fwynhau yno.

Mae bwyty teuluol Siop Nain yn lle perffaith i lenwi'ch bol ar ôl diwrnod o grwydro o gwmpas Rhuthun. Eisteddwch i lawr a mwynhewch ddiod boeth a byrbryd llwyr haeddiannol, o rarebit Cymreig i baninis. Os oes awydd arnoch i wneud ychydig mwy o siopa, ewch i'r siop anrhegion sydd ganddynt hefyd.

Abergwaun

Dihangwch i fyd o lyfrau yn Siop Lyfrau Seaways. Yn berffaith ar gyfer prynhawn hamddenol, archwiliwch yr amrywiaeth o lyfrau sydd ar gael a sbwyliwch eich hun neu anwylyn gyda llyfr newydd dros yr ŵyl. Am flas lleol o Abergwaun, ewch i siop anrhegion Jelly & Custard. Wedi'i rhedeg gan ddau ffrind, mae eu silffoedd wedi'u hailgylchu, sy’n adnabyddus erbyn hyn, yn llawn danteithion, o glustogau a bagiau i anrhegion bach i'w rhoi yn eich hosanau Nadolig.

Ydych chi’n siopa gyda'r rhai bach neu’n bwriadu prynu anrheg i rywun sy’n hoff o ddanteithion melys? Rhowch anrheg â naws hiraethus iddi o West Street Sweets, sy’n siop deuluol. Porwch y silffoedd yn llawn losin lliwgar, lle gallwch ddod o hyd i ddiod gartref Dwrcaidd, bocsys o daffi moethus, cregyn môr wedi’u creu gyda siocled a llawer mwy.

Dysgwch ragor am y gwahanol leoliadau y mae gwasanaethau fflecsi yn teithio iddynt a sut i archebu eich taith nesaf: https://trc.cymru/fflecsi/lleoliadau