29 Gor 2026

Mae Mis Balchder Anabledd yn amser i gydnabod, dathlu ac anrhydeddu cyflawniadau a phrofiadau bywyd amrywiol pobl anabl. Mae hefyd yn gyfle i godi ymwybyddiaeth o'r rhwystrau y mae pobl yn dal i'w hwynebu ac i hyrwyddo cynhwysiant, hygyrchedd a chydraddoldeb ar draws cymdeithas ac yn y gwaith.

Ym mis Gorffennaf eleni, byddwn yn rhoi sylw i waith ein Panel Teithio Pobl Anabl. Mae'n helpu i sicrhau bod ein trenau, bysiau, gorsafoedd, cyfnewidfeydd a safleoedd bws yn hygyrch ac yn gynhwysol i bawb, drwy gydol y flwyddyn.

Mae pobl yn defnyddio ein rhwydwaith trafnidiaeth bob dydd i ymweld â ffrindiau a theulu, cyrraedd y gwaith a chael mynediad at ofal iechyd, addysg a gweithgareddau hamdden. Mae creu rhwydwaith sy'n gweithio i bawb yn ganolog i'r hyn a wnawn. Rydym am i bawb deithio gyda hyder, annibyniaeth ac urddas.

Mae'r 21 o bobl ar y Panel yn rhoi cipolwg hanfodol o'u profiadau bywyd eu hunain o ddefnyddio trafnidiaeth gyhoeddus. Maent yn chwarae rhan weithredol yn cynghori ar atebion teithio hygyrch yn ogystal â'u profi, eu gweithredu a'u gwella.

Dyma rai o'r pethau maen nhw wedi ein helpu i'w cyflawni.

Platfformau mwy diogel

Mae palmant botymog ar ymylon ein platfformau yn fesur diogelwch hanfodol i bobl ag amhariad ar y golwg. Mae rampiau integredig ar ein trenau Dosbarth 756, 231 a 398 hefyd yn gwella mynediad o'r trên i'r platfform.

Gorsafoedd hygyrch

Mae deuddeg gorsaf ledled Cymru yn cael eu huwchraddio i fodloni safonau hygyrchedd modern drwy’r ymgyrch Mynediad i Bawb. Mae gwaith ar y gweill yn Cathays ar bont droed newydd sbon i alluogi mynediad lifft, heb risiau, i ddefnyddwyr cadeiriau olwyn, llwybrau cerdded gwell a mynediad uniongyrchol i Ganolfan Bywyd Myfyrwyr Prifysgol Caerdydd.

Mwy o gwsmeriaid yn teithio gyda hyder

Teithiodd 75,339 o deithwyr, sef nifer record, yn hyderus yn 2024/25, diolch i'n gwasanaeth Cymorth i Deithwyr. Mae'n darparu cefnogaeth ar bob cam o'r daith – o gynllunio teithiau a phrynu tocynnau i ddarparu cymorth wrth fynd ar y trên a dod oddi arno. Mae cydweithwyr yn cael eu hyfforddi i sicrhau bod anghenion cwsmeriaid yn cael eu diwallu wrth archebu a theithio gyda Chymorth i Deithwyr.

Teithio annibynnol yng Nghyfnewidfa Fysiau Caerdydd

Wedi'i gefnogi gan fyrddau mapiau canfod ffordd gydag elfennau Braille a chyffyrddadwy a baeau bws statig. Mae ein fideos iaith arwyddion ynglŷn â chyfleusterau’r safle yn cynnwys disgrifiadau sain yn y Gymraeg a'r Saesneg. Mae yna hefyd gyntedd eang, sy'n ei gwneud hi'n haws i ddefnyddwyr cadeiriau olwyn symud o gwmpas.

Hygyrchedd digidol

Mae hygyrchedd wedi'i ymgorffori yn ein hoffer a'n apiau digidol sy'n cael eu defnyddio gan gwsmeriaid. Er enghraifft, rydym wedi defnyddio WhatsApp i alluogi cwsmeriaid (gan gynnwys y rhai a allai ei chael hi'n anodd cyfathrebu â llais) i wneud ymholiadau amser real a derbyn ymatebion amserol.

Ap Iaith Arwyddion Prydain

Rydym yn defnyddio ap dehongli Iaith Arwyddion Prydain (BSL), sy'n galluogi cyfathrebu dwyffordd rhwng defnyddwyr Iaith Arwyddion Prydain a phobl nad ydynt yn ei defnyddio. Mae'n diwallu anghenion cwsmeriaid, o faterion brys i gyngor teithio pellach neu ymholiadau am docynnau.

Hyfforddiant

Bob blwyddyn, mae ein Panel Teithio Pobl Anabl yn cefnogi hyfforddiant amrywiaeth a hygyrchedd i 1,200 o gydweithwyr rheilffyrdd. Mae hyn yn cryfhau dealltwriaeth o'r rhwystrau a'r heriau y mae pobl anabl yn eu hwynebu wrth deithio.

Dywedodd Dr Robert Gravelle, Rheolwr Hygyrchedd a Chynhwysiant:

“Does dim ffordd well o wneud gwasanaeth yn hygyrch ac yn gynhwysol na chynnwys pobl sy’n gwybod pa mor heriol y gall trafnidiaeth gyhoeddus fod os oes gennych chi anabledd. Mae’r cyngor a’r adborth gonest y mae aelodau’r Panel yn eu darparu yn llunio ein gwasanaethau i adlewyrchu anghenion gwirioneddol y bobl rydyn ni’n eu gwasanaethu.

“Rydym yn cael adborth gan gwsmeriaid yn dweud bod mynediad gwastad rhwng y trên a’r platfform, lifftiau newydd i deithwyr, y gwasanaeth cymorth i deithwyr a mesurau hygyrchedd eraill wedi trawsnewid hyder pobl i deithio ar drafnidiaeth gyhoeddus, sy'n foddhaol iawn.

“Bydd cylch gwaith TrC, sydd yn ehangu wrth i fentrau cerdded, olwynio a beicio gael eu hychwanegu at deithiau bws a thrên, yn rhoi heriau newydd inni eu harchwilio yn y dyfodol ond rydym yn parhau i fod wedi ymrwymo i wneud teithiau o ddrws i ddrws gan ddefnyddio trafnidiaeth gyhoeddus yn hygyrch i bawb.”

Dywedodd Andrea Gordon, Cadeirydd Panel Teithio Pobl Anabl Trafnidiaeth Cymru:

“Mae’r Panel Teithio Pobl Anabl yn grŵp o bobl anabl sy’n defnyddio trafnidiaeth gyhoeddus yn aml. Mae’r holl safbwyntiau rydyn ni’n eu rhannu gyda Trafnidiaeth Cymru yn dod o brofiad gwirioneddol o’r rhwystrau rydyn ni’n eu hwynebu, yn ogystal â dathlu gofal cwsmeriaid gwych. Gobeithiwn ymestyn ein cyfranogiad i wasanaethau bysiau hefyd a gweithio gyda Trafnidiaeth Cymru i sicrhau bod pob elfen o bob taith yn gynhwysol. Credwn fod hyn yn gyraeddadwy ac rydym yn herio pawb sy’n gysylltiedig i chwarae eu rhan.”

I ddysgu rhagor am sut rydym yn adeiladu rhwydwaith trafnidiaeth hygyrch, ewch i:
https://trc.cymru/gwybodaeth/teithwyr/teithio-hygyrch